May panugyan ang Bacolod City Health Office kasunod sang narekord na pagsaka sang kaso sang leptospirosis sa ciudad sa bulan sang Nobyembre.
Sa pahayag ni Bacolod City Health Officer Dr Carmela Gensoli, bangud sa sunod sunod nga pagbaha kag pag-ulan may yara sang pila ka mga pumuluyo ang nag-ubog sa tubig baha rason nga nakakuha ang mga ini sang leptospiros.
Suno kay Gensoli nagsaka ang kaso sang nasambit nga balatian sa ciudad sang Bacolod bangud santo sa data halin sa October 26 tubtob November 22, 2025 ang kabug-usan nga kaso sang Leptospirosis sa Bacolod City ang nagdangat sa 50.
May yara sang pinakadamo amo ang Barangay Handumanan nga may lima, Banago apat, Villamonte, Mansilingan kag Estefania ang may tag tatlo ka kaso, Barangay Felisa, Barangay 14, Alangilan, Sincang-Airport kag Tangub may tag duha ka kaso.
Nagdangat naman sa siyam ang napatay bangud sa nasambit nga balatian kag ang latest amo ang duha nga narekord sa morbidity week 47 ukon para sa November 16-22 nga data.
Panawagan ni Gensoli sa tanan nga nakaubog sa baha mag-inom sang bulong para sa anti-leptospirosis nga ginapanagtag sang City Health Office sang libre.
Suno diri nagpangayo naman ini sa national sang dugang nga supply kag nagpasalig naman ang Department of Health Negros Island Region nga maghatag man.
Gin-athag ni Gensoli nga indi makabakal sang kaangay nga bulong sa botika nga wala sang reseta.
