Nasapwan ang bangkay sang wala pa makilal-an nga lalaki sa sulod sang isa ka pribado nga salakyan sa Barangay Efigenio Lizares, Talisay City, Negros Occidental, Disyembre 2, alas 4:50 sang hapon.
Sa interview sang Bombo Radyo kay Police Major Rhazl Jim Jocson, deputy chief of police sang Talisay City Police Station, ginreport sa ila sang tag-iya sang Hyundai Getz, 2009 model nga nagaduag pink, nga may nakit-an ini nga bangkay sang lalaki nga nagapungko sa driver’s side.
Suno kay Jocson, ang lalaki ang nagasuksok sang pula nga short kag wala sang pang-ibabaw nga panapton.
May nakita nga sweatshirt sa tupad sini nga nagaduag grey ukon dark grey.
Ini ang may kataason sang 5 feet 2 inches kag ginabanta naga-edad sang 25 tubtob 30.
Suno sa deputy chief of police, makit-an man nga nakahilay ang bangko sa driver’s side kag daw kaangay nga nakapwesto nga gintulugan.
May nakit-an nga signs of struggle apang ginahibalo pa sa karun ang rason kun ngaa wala ini nakagwa sa vehicle.
Ginabanta tatlo tubtob lima ka adlaw na nga yara ang bangkay sang lalaki sa salakyan bangud yara na ini sa advance state of decomposition.
Suno diri, ginpahayag sang tag-iya nga wala niya masami nga ginagamit ang nasambit nga salakyan bangud may iban pa ini nga unit kag nanotisyaran na lamang nga may tawo sa sulod sang may napanimahuan nga foul odor.
Nagapanawagan si Jocson sa mga nadulaan sang himata nga makig-angot lamang sa Talisay City Police Station agud matumod ang identity sang bangkay.
