Target nga makakuha sang 2.175 million cubic meters sang basura sa ginapatigayon nga massive cleaning sa idalom sang programa nga Oplan Kontra Baha sa ciudad sang Bacolod.
Kahapon may yara kuntani sang launching sang Oplan Kontra Baha nga pagapangunahan kuntani President Ferdinand Marcos Jr apang wala ini nakaabot.
Apisar sini ginpadayon sa gihapon ang massive clearing sang river warriors sa idalom sang Oplan Kontra Baha nga ginpangunahan ni DPWH Undersecretary Charles T. Calima Jr.
Kahapon, gintinluan sang river warriors ang Mambuloc Creek sa bahin sang Barangay 2 kag Barangay 6 kun sa diin madamo nga mga basura ang nakuha.
Suno kay DPWH Undersecretary Charles T. Calima Jr., naggamit ang team sang Oplan Kontra Baha sang amphibious dredger sa paghawan sang silted ukon nagnabaw na nga Mambuloc creek.
Ang amphibious dredger ang nagikan pa sa DPWH Victorias City nga temporaryo nga gindeploy sa ciudad sang Bacolod para sa massive clearing.
Suno kay Calima mas madamo nga heavy equipments ang ginpadala sang ila nga mga private sector partners.
Suno diri manami sa ciudad sang Bacolod bangud indi lang ang gobyerno ang naga-effort bangud ang private sectors ang nakakita nga may problema kag nagpadala man sang bulig.
Dugang pa sini bangud sa TUPAD program nga initiative ni Bacolod City Lone District Congressman Alfredo “Albee” Benitez kun sa diin nagdangat na sa 21 percent ang accomplishment gikan sa target.
Aminado man si Calima nga dako nga pagpanghangkat ang pagpabilin sang katinlo sang waterways bangud gintinluan ini sa karun apang indi magdugay madamo naman ang basura bangud sa poor waste management sang tawo.
Samtang suno naman kay Bacolod City Lone District Congressman Alfredo “Albee” Benitez nga dapat ang Barangay na ang magabantay agud mapabilin ang katinlo sang mga waterways nga gintinluan sang river warriors.
