Mga Barangay nga “at risk” sa pagbaha kag landslide sa pagtupa sang Bagyo WILMA, nagadangat sa masobra dose mil suno sa DENR

Nagdangat na sa 12,016 ang mga barangay nga at risk sa landslide kag pagbaha bangud sa epekto sang shearline kag Tropical Depression Wilma.

Sa ginpagwa nga geohazard advisory sang Mines and Geosciences Bureau sang Department of Environment and Natural Resources (DENR), gintumod ang mga flood-prone area lakip na ang mga lugar kun sa diin ang magagmay nga suba nga nagakonekta sa dalagko nga suba, mga manubo nga lugar, ang mga lugar kun sa diin nagasugat-anay ang suba kag kadagatan, swamps kag coastal areas kasubong man ang riverbanks nga nagaawas kun nagaulan.

Ang warning signs naman sa landslides amu ang mga litik sa duta, nakatalikid nga puno kag pader, hinali nga pag-ilig sang tubig sa duta kag magagmay nga land erosion.

Agud malikwan ang mga negatibo nga epekto sang landslide kag pagbaha, ginmanduan sang ahensya ang publiko nga yara sa nasambit nga mga lugar nga mangin alerto sa mga pagsaka ukon pagnubo sang level sang tubig-baha.