Nagpabutyag sang pagsuporta kay House Speaker Faustino “Bojie” Dy III ang pila ka mga mamalidha paagi sa pagpagwa sang pormal nga manifesto.
28 ka kongresista sa Southern Luzon ang nagpirma sang manifesto nga may “full and unequivocal support” kay Dy.
Suno diri, importanti ang stable nga pagdumala sa Kongreso kag si Speaker Bojie ang isa sa nagapakita sang stability sa tunga sang kabudlayan sa pungsod.
Sa pihak nga bahin, lakip sa nagpirma ang 14 ka lawmakers sang Bicol bloc nga nagapakita sa ila padayon nga pagtrabaho kaupod ang Speaker.
Upod sa mga nagpirma amo sanday Ako Bicol party-list Representative Alfredo Garbin Jr. kag Bicol Saro party-list Representative Terry Ridon.
Madumduman nga sang nakaligad nga Nobyembre, 39 ka mga kongresista halin sa Northern Luzon Alliance upod si House Majority Leader Sandro Marcos ang nagpirma sang manifesto nga nagapakita sang suporta kay Dy tunga sang mga isyu parte sa posible nga pagbag-o sang liderato.
