Nagpatigayon sang search warrant ang National Bureau of Investigation–Organized and Transnational Crime Division (NBI-OTCD) sa sulod sang mga condominium unit ni anay Ako Bicol party-list representative Zaldy Co sa Bonifacio Global City sa Taguig kahapon, Disyembre 11, 2025.
Ang search warrant ang gin-issue sang Regional Trial Court sa Taguig, nga nagahatag otoridad sa mga imbestigador nga mangita sang dugang nga ebidensya may kaangtanan sa mga kaso sang graft nga ginpasaka batok kay Co angot sa ma-anomalya nga flood control project sa Oriental Mindoro.
Ginpahayag ni NBI spokesperson Atty. Palmer Mallari nga sa una nga inspection order nga gin-issue sang Makati RTC, visual search lamang ang ginatugutan sa NBI kag Philippine Competition Commission (PCC) agud indi malapas ang Philippine Competition Act.
Ang sa karun nga search warrant ang nagahatag na sang mas dako nga otoridad.
Suno kay Mallari, ang search warrant ang nagatugot sa NBI agents nga kumpiskahon ang ano man nga dokumento ukon kwarta nga posible may kaangtanan sa imbestigasyon.
Suno diri, obligado ang mga operatiba nga maghatag sang update kag post-operation report sa direktor agud makapagwa man sang updates sa resulta sang search warrant implementation.
Ginklaro ni anay Department of Labor and Employment (DOLE) Secretary Silvestre Bello III nga indi si Presidente Ferdinand Marcos Jr. ang nag-offer sa iya nga magkandidato sa Davao City.
Una nga ginpahayag ni Bello nga gin-oferan siya sang P1 billion agud nga magdalagan sa Davao City batok kay Rep. Isidro Ungab nga kilala bilang kaalyado ni anay Pres. Rodrigo Duterte.
Nahibaluan nga si Bello ang isa sa mga miyembro sang PDP Council of Elders.
Sa isa ka forum nga gin-organisar sang Partido Demokratiko Pilipino–Lakas ng Bayan, ginklaro ni Bello nga indi si Pres. Ferdinand Marcos Jr. ang nag-offer sa iya nga magpadalagan bilang kongresista.
Apang, nagpanindugan siya nga ang tawo nga nagpalapit sa iya ang kilala sang presidente.
Nagapati man ini nga may yara ini sang clearance gikan kay Presidente Marcos.
Suno diri, sang wala niya ginbaton ang offer, gilayon siya nga ginpahalin bilang chairman sang Manila Economic and Cultural Office (MECO).
Dugang pa ni Bello, nga una niya ginapaminsar nga siya ang padalaganon bilang alkalde batok kay former President Duterte.
Nagpanindugan ang anay Duterte appointee nga wala siya sang plano nga kontrahon ang anay presidente nga dugay na naman niya nga abyan.
Pormal nga nagpanumpa si Atty. Johann Carlos Barcena bilang bag-o nga commissioner kag chairperson sang National Privacy Commission (NPC).
Ginpangunahan ni President Ferdinand Marcos Jr. ang pagpanumpa ni Barcena sa Malacañang.
Nahibaluan nga antes nangin NPC commissioner, si Barcena ang nagserbe biliang executive director sang Governance Commission for Government owned and Controlled Corporations (GCG).
Nakapagkit sa Republic Act 10173 ukon Data Privacy Act nga ang privacy commissioner ang magserbe sang tatlo ka termino.
