Ginpaathag sang National Bureau of Investigation (NBI) nga posible makagwa ang contractor nga si Sarah Discaya sa ila talatapan bangud wala pa sang ginpagwa nga warrant of arrest batok diri.
Suno kay Acting NBI Director Angelito Magno, wala sila sang legal nga basihan para punggan si Discaya bangod wala pa sang mando halin sa korte.
Ginpaathag man ni Magno nga yara pa sa NBI si Discaya kag gilayon nga iserbe ang warrant kun ipagwa na sang korte.
Madumduman nga boluntaryo nga nagsungka si Discaya sang nagligad nga semana matapos nga ginpahayag ni President Ferdinand Marcos Jr. nga ginalauman ang pagpagwa sang warrant of arrest nga may kaangtanan sa mga anomalya sa mga flood control project.
Apang ginklaro sang kampo ni Discaya nga ang iya pagsungka ang isa ka legal nga tikang kag indi ini pag-ako sang sala.
Madumduman nga nagaatubang sang mga kaso nga malversation kag paglapas sa Anti-Graft and Corrupt Practices Act si Discaya upod sang siyam pa ka iban may kaangtanan sa gina-alegar nga P96.5 million nga ghost flood control project sa Davao Occidental.
