Wala pa sang nag-claim nga pamilya sa nasapwan nga nagakaagnas nga bangkay sa kampo sang tubo sa Hda Bernabe, Brgy Salvacion, Murcia, kahapon sang aga.
Sa interview sang Bombo Radyo Bacolod kay Police Captain Honey Labaro, hepe sang Murcia Municipal Police Station, wala pa sang pamilya nga nagpalapit sa ila agud nga makig-angot sa nadula nga himata kag posible nga ini ang bangkay nga nasapwan sa kampo sang tubo sa Barangay Salvacion.
Suno kay Labaro, ang bangkay ang yara sa morgue kag ginparequesan pa sang autopsy agud nga mahibaluan kun ano ang gintunaan sang kamatayon sini.
Suno sa hepe, indi pa ini makahatag sang iban nga detalye bangud nga wala pa sang resulta ang examination sang operatiba sang Scene of the Crime Operation (SOCO).
Madumduman nga nasapwan ang bangkay nga nakalubong apang may bahin nga nagalabaw sa duta nga nagaka-agnas na, nga nakit-an kapin 10 ka metros gikan sa highway.
Ini ang ginreport sang tapasero sang tubo.
Sa karun wala pa sang identity sang bangkay kag ginpaproseso na sa punerarya.
Ang lugar kun sa diin nasapwan ang biktima ang 2-3km gikan sa proper kun maglabay sa bag-ong dalan.
Wala naman sang missing persons sa nasambit nga banwa.
Nagpanawagan man si Labaro sa kun sin-o man ang may himata nga nadula makig-angot lamang sa ila sa Murcia Municipal Police Station agud sila ang maassist.
