Nakilala na ang lalaki nga nalapakan sang wala matumod nga salakyan sa Hacienda Bearin, Barangay Manalad, sa banwa sang Ilog alas-5:00 sang kaagahon sang December 21, 2025.
Ginkilala ini kay alyas Ed kag residente sang Barangay Canlamay, Ilog, Negros Occidental.
Sa interview sang Bombo Radyo Bacolod kay Police Major Randy Babor, hepe sang Ilog Municipal Police Station, ang biktima ang ginkilala sang iya pakaisa nga nagatrabaho sa Kabankalan City.
Suno kay Babor, ginkumpirmar man sang pakaisa sang biktima nga ini ang may yara sang deperensya sa paminsaron kag wala na nakapauli sa ila nga lugar.
Suno sa hepe ang bangkay sang biktima ang gin-claim naman sang pamilya.
Padayon man ang pagpangita sang mga kapulisan sang lead nga makatumod sang salakyan nga nakaipit sa biktima apisar pa nga wala na sang plano ang pamilya sang biktima nga magpasaka sang kaso.
Natalana naman nga pabutangan sang suga sang Local Government Unit sang Ilog ang nasambit nga dalan.
