Patay ang isa ka babayi matapos nga gintiro sang wala makilal-an nga mga persona sa Sitio Makilo, Brgy Camansi, Kabankalan City, Negros Occidental, kaina sang aga, December 24, 2025.
Ginkilala ang biktima kay Warlita Jimenez, 55 anyos kag residente sang nasambit nga lugar.
Nakabaton sang impormasyon ang Kabankalan City Police Station nga may yara sang nagluntad nga shooting incident sa nasambit nga lugar.
Gilayon man nga nagpadulong sa lugar sang insidente ang duty investigators kag intel operatives sang nasambit nga police station nga ginpangunahan ni Police Lt Nolly Gudaca ang Deputy Chief of Police kaupod ang 3rd Mobile Patrol; Regional Mobile Force Battalion (RFMB) sang Negros Island Region agud nga tsekyaron ang insidente.
Santo sa impormasyon nga natipon sang mga otoridad gikan sa apo sang biktima nga nakatulog ang mga ini sang gintindakan sang makaduha ka beses ang ila nga pwertahan sang ila balay.
Nagsulod ang duha ka mga wala makilal-an nga persona kag nagdirekta sa kwarto sang biktima kun sa diin wala sang madamo nga estorya gintiro sang pila ka beses.
Nakaagom sang madamo nga igo sang bala sa nagkalain-lain nga bahin sang lawas si Warlita nga gintunaan sang iya kamatayon.
Narecover sa lugar sang insidente ang anum ka fired cartridge case sang caliber 45, isa ka fired cartridge case sang caliber 9mm kag tatlo ka bilog nga deformed slug sang caliber 45.
Nagapadayon man sa karun ang imbestigasyon sang mga otoridad agud nga matumod ang motibo sang krimen kag ang mga suspetsado nga nagpatay sa biktima.
