Patay ang driver samtang pilason ang backrider sang motorsiklo sa nagluntad nga aksidente sa Purok Lubi, Barangay Mambaroto, Sipalay City, Negros Occidental sang Disyembre 23, 2025 sang gab-i.
Suno sa Sipalay City Police Station may nabaton sila nga impormasyon nga may yara sang vehicular accident kag gilayon man nila nga ginrespondehan.
Sa imbestigasyon, ang motorsiklo nga ginamaneho ni Jeffrey Saril, legal ang edad kag residente sang Brgy. Ilihan, Cauayan, Negros Occidental samtang angkas si Wilson Recto, 49 anyos, kasado kag residente sang Purok 5, Brgy. 5, Sipalay City, Negros Occidental ang nagabiyahe padulong sa Gil Montilla, Sipalay City ang aksidente nga nakabunggo sa sementado nga pulungkuan sa atubang sang balay ni Gemar Bernas.
Bangud sa impact ang backrider ang nakaagom sang mga pilas sa nagkalain-lain nga bahin sang lawas sini kag gindala sang nagresponde nga personnel sang Sipalay City Disaster Risk Reduction Management Office (Sipalay CDRRMO) sa infirmary para sa pagbulong apang si Saril ang gindeklarar nga dead on arrival.
Ginsaylo naman si Recto sa hospital sa ciudad sang Bacolod para sa dugang pagbulong.
Suno kay Jackylou Recto, mga alas 7:00 ang takna sang gab-i ang bana sini nga si Wilson kaupod ang mga abyan ang nag-inum sang makahulubog nga ilimnon sa Barangay 1, Sipalay City.
