Indi anay magapatigayon sang New Years Countdown kag Fireworks Display ang Hong Kong Government bilang paghatag simpatya sa mga biktima sang pagkasunog sang building sa Tai Po sang Nobyembre 26.
Madumduman nga nagdangat sa 127 ang narecord nga napatay sa pagkasunog sang high rise building nga ginapuy-an sang 4,600 nga residente, kag madamo gihapon sang nagapabilin nga missing.
Sa interview sang Bombo Radyo Bacolod kay Jeje Padilla Casa Vergara, Bombo International News Correspondent gikan sa Hong Kong, tuigan nga may ginapatigayon nga fireworks display sa Hong Kong nga ginahimo sa tunga sang dagat, samtang may mga designated areas naman para sa mga tumalan-aw.
Apang bilang pag-unong sa mga nalisdan nga pamilya sa nagluntad nga sunog, ini ang temporaryo nga ginpaiway sang Hong Kong government subong nga tuig.
Samtang depende naman sa employer ang pagselebrar sang mga Pilipino sang New Years Eve subong nga Disyembre 31.
Suno diri, may mga locals nga wala nagaselebrar bangod Pebrero ang Chinese New Year, apang madamo man sang nagaselebrar sang New Year kun Disyembre 31.
Pahayag ni Vergara nga ang iya employer ang Chinese, apang ini ang nagrequest na sa iya sang spaghetti kag lumpia para sa pagsugata sang Bag-ong Tuig.
