Nasapwan ang isa ka bangkay sang wala makilal-an nga lalaki sa Bago River, Purok Narra, Barangay Mailingin, Bago City, Negros Occidental kahapon sang hapon, Disyembre 28, 2025.
Sa interview sang Bombo Radyo Bacolod kay Police Captain Bonifacio Galvez Jr, Deputy Chief of Police sang Bago City Police Station, ang bangkay ang nasapwan sa tunga sang suba.
Suno kay Galvez, ginpahayag sang mga kabataan nga nagpangisda sa suba nga sang Sabado pa nila nakita ang bangkay apang gindumdom nga ini ang isa lamang ka maleta.
Liwat ang mga ini nga nagpangisda kaina sang hapon, kag sang gintsekyar didto na nahibaluan nga ini ang bangkay sang isa ka lalaki nga nagakulob.
Nagasuksok ang biktima sang pula nga shorts kag wala naman ini sang pang ibabaw nga panapton.
Ginpahibalo naman sang mga kabataan ang ila tiyo kag ini ang nagtawag sa Bago City Police Station kun sa diin ila man nga ginpadulungan.
Ang bangkay ang yara nagakaagnas na kag yara na ini sa punerarya kun sa diin natalana nga ipaidalom sa postmortem examination.
Nagapanawagan si Galvez sa mga may himata nga wala nakapauli makig-angot lamang sa Bago City Police Station.
