Nagapanawagan ang Business Permit and Licensing Office (BPLO) sa mga punong barangay nga magkooperar sa Business One-Stop Shop (BOSS) sa ciudad sang Bacolod.
Sa interview sang Bombo Radyo kay Stela Rose Rayos, head sang Business Permit and Licensing Office, sa ulihi nga datos Enero 6, may yara na sang masobra 5,841 ka mga negosyo ang nakarehistro kag 3,854 ang naka-avail na sang advance processing nga nagsugod sang Nobyembre 15 sang nakaligad nga tuig.
Nahibaluan nga opisyal nga ginsugudan ang Business One-Stop Shop sang lunes, Enero 5.
Suno diri, sa ika-tatlo nga adlaw sang aktibidad sa Bacolod City Government Center, nagadamo pa gid ang naga-avail sang serbisyo para sa pagparehistro kag pagrenew sang ila mga business permits.
Suno kay Rayos, sa 61 ka mga barangay sa ciudad sang Bacolod, 36 lang ka mga barangay ang present sang Lunes samtang 44 naman ka mga Barangay ang nagpartisipar kahapon.
Panawagan sini sa pila ka mga Barangay nga magkooperar agud nga mapadasig kag mapahapos ang proseso.
Ang Business One-Stop Shop (BOSS) ang padayon nga maga-akomodar sa mga business owners tubtob sa Enero 20 kag bukas Lunes tubtob Sabado.
