Magahire sang apat ka Department Heads kag isa ka Assistant Department Head ang provincial government sang Negros Occidental.
Sa interview sang Bombo Radyo Bacolod kay Provincial Administrator Atty Rayfrando Diaz, ang mga bakante nga pwesto para sa Department Heads ang bangod sa bag-o nga natukod nga departamento, nagretiro nga department head kag nadismiss nga opisyal.
Lakip diri ang Provincial Disaster Risk Reduction and Management Office (PDRRMO) nga ginhimo na nga separado nga departamento subong nga 2026.
Open naman ang hiring sa nasambit nga pwesto, gani mahimo man mag-apply si acting head Irene Bel Ploteña.// Samtang kinahanglan naman nga mabutangan sang Department Head ang Provincial Agriculture Office bangod si Provincial Agriculturist Dina Genzola ang acting head lamang.
Samtang nabakante naman ang Department Head sa Provincial Accounting Office matapos magretiro si Provincial Accountant Annabelle Magalona.
Samtang nadismiss naman sa serbisyo si Provincial Human Resource Management Office Head Atty Anabelle Palic.
Kinahanglan naman sang Assistant Department Head sa Negros Occidental Language and Information Technology Center (NOLITC) nga ginapamunuan ni Dr Tina Basa.
Pasalig ni Diaz nga magalabay sa nagakaigo nga proseso kaangay sang test, interview, validation kag iban pa ang mga maga-apply sa pwesto.
Ang Department Heads ang makabatun sang Salary Grade 26, samtang Salary Grade 24 naman sa Assistant Department Heads.
Sa pihak nga bahin, narenew naman ang kontrata para sa mga Casual, Job Order kag Contract of Service Employees sang Provincial Government.
Gamay lamang sa mga ini ang wala ginrekomendar nga marenew bangod sa mga violations.
Nagdangat sa 666 ka mga casual employees ang narenew, 1,076 ka Constract of Service, kag 195 sa Job Order employees
Ang ila nga kontrata ang nagalawig sang tunga sa tuig ukon halin Enero tubtob Hunyo 2026.
