Hugot nga ginadumilian sang layi ang pag-drive nga hubog ukon naka-inom.
Gani bilang pagsunod sa layi kag paglikaw sa disgrasya, gintulod sang tatlo ka mag-abyan ang ila salakyan sang nagpa-uli ang mga ini halin sa ilimnan.
Ini ang natabo sa Hubei Province sa China.
Ginpatay nila ang makina kag ang isa sa ila ang naglakat sa ingod sang pirtahan sang driver nga naglab-ot sa manibela samtang ang duha ang yara sa likod sang salakyan kag nagatulod.
Sa dalayon, nakalab-ot sila sa isa ka repair shop kag nag-cover sang halos 500 meters.
Nakuhaan ini sang mga CCTV camera kag sang naglapta online, madamo ang nagdayaw sa ila.
Sa pihak sini, ginmultahan sila gihapon sang kapulisan.
Matuod nga nakalikaw sila sa kaso bangud sa pagmaneho nga naka-inom, ginlapas nila gihapon ang Article 31 sang Road Traffic Safety Law sang China kun sa diin, ang mga tawo ang ginadumilian nga maggamit sang dalanon para sa non-traffic activities nga wala sang pahanugot.
Ang ila mahinay nga salakyan ang nagkuha sang dako nga espasyo sa dalan nga nagatuga sang risgo sa safety sang mga ini.
