Duha ang napatay samtang nadugmok ang duha ka mga salakyan matapos nga marumpag ang isa ka crane sa dalan malapit sa capital sang Thailand.
Ini ang natabo isa ka adlaw matapos nagluntad ang kaangay nga aksidente nga ginkamatay sang 32 ka mga pasahero.
Suno sa transport minister sang Thailand, na-involve man sa insidente ang construction firm nga Italian-Thai Development PCL nga nahulugan man sang crane sa train isa ka adlaw ang nakaligad.
Ginpahayag ni Prime Minister Anutin Charnvirakul nga nagaplano ang iya gobyerno nga kanselahon ang duha ka kontrata sa ITD nga naga-involve sang duha ka accident-hit projects.
Nagpasalig man ini nga magapasaka sila sang kaso batuk sa firm.
Ginmando man ang pag-untat sang madamo nga ITD construction projects kag ginapaidalom sa review.
Sa isa ka statement, ginpahayag sang firm nga nakahanda sila nga magbaton sang responsibilidad pinaagi sa paghatag sang pag-ulikid, pagbayad kag remedyo sa resulta sang duha ka insidente.
