Tuman ang kasubo nga nabatyagan sang iloy ni Engr. Fredirick Deximo, tumandok sang banwa sang Isabela, Negros Occidental, matapos nga ginkumpirmar kahapon nga nagtaliwan na ang iya bata kasunod sa nagluntad nga landslide sa Sanitary Landfill sa Binaliw, Cebu City sang Enero 8.
Sa interview sang Bombo Radyo kay Erlinda Deximo, iloy ni Engr. Fredirick Deximo, wala gid siya nakahibalo nga ang iya nga bata ang naga-ubra sa Prime Integrated Waste Solutions, Inc. (PWS).
Suno kay Erlinda, nakabaton ini sang tawag nga isa sa mga natabunan sang landslide ang iya nga bata apang nagalaum ini sa gihapon nga buhi pa ang iya bata.
Suno diri, sang Enero 10, nakabaton sa liwat siya sang tawag halin sang iya hinablos nga buhi pa si Fredirick.
Bangud sini, nagkalma si Erlinda kag suno diri, ang nurse nga upod sang iya bata ang nakatawag man kag naghambal nga buhi pa sila apang sila ang na-trap sa sulod sang underground clinic sang Prime Integrated Waste Solutions, Inc. (PWS) kag natabunan sang duta.
Tuman ma ang kahadlok ni Erlinda bangud sa pamangkot kun paano ini sila makasurvive nga wala sang tubig kag pagkaon.
Ginkumpirmar sang Sabado nga ang nurse nga upod sang iya bata ang wala na sang kabuhi.
Samtang kahapon naman sang aga (Enero 16), opisyal nga ginkumpirmar nga narecover na ang lawas ni Engr. Fredirick sa ginpatigayon nga search and rescue operations sang mga otoridad apang gindeklarar nga wala na sang kabuhi.
Nahibaluan nga si Engr. Fredirick ang may duha pa ka mga kabataan nga naga-eskwela pa sa Isabela, Negros Occidental, isa ka First Year High School kag isa ka Second Year High School.
Tatlo ka tuig na ang nakaligad sang si Engr. Fredirick ang nagkadto sa Cebu agud nga magtrabaho matapos nga nagtaliwan ang iya nga asawa.
Ginbilin sini ang iya mga kabataan kay Erlinda.
Panawagan ni Erlinda sa nasambit nga kompanya nga mahatagan sang financial support para sa nabilin nga kabataan ni Engr. Fredirick bangud sila ang senior citizen na kag wala sila sang ikasarang nga makahatag sang pagpakaon kag mahimo nga makapaeskwela.
