Magapangatubang sang kaso nga double homicide ang 30 anyos nga lalaki sa pagbuno-patay sa duha ka abyan sini nga upod sa pag inom-inom sa Purok Orchids, Barangay Santol, Binalbagan, Negros Occidental, sang Enero 15 alas- 9:00 sang gab-i.
Ang mga biktima ang ginkilala nga sanday Arnel Paculares, 25 anyos, kag Lemping Olveros, 61 anyos, samtang ang suspek naman amo si Joelyn Sinto, 30 anyos, lunsay mga residente sang nasambit nga lugar.
Sa interview sang Bombo Radyo kay PCapt Joelan Vinson, hepe sang Binalbagan Municipal Police Station, magka-upod ang tatlo sa paginom-inom kag sang papauli na, natabo ang insidente sa balay ni Sinto.
Suno diri, nag-init ang ila nga diskusyon nga nagtuga sang wala pag-intindihanay bangod ginasunlog sang duha ka biktima ang suspek.
Hinali lang ginbuno ni Sinto si Paculares sa nagakalain-lain nga bahin sang iya lawas kag nagtambag si Olveros apang siya ginbuno man ni Sinto.
Nadakpan si Sinto kag sa karun yara na sa kustodiya sang Binalbagan Municipal Police Station.
