Ginpasalig sang Weather Specialist sang Philippine Atmospheric, Geophysical and Astronomical Services Administration (PAG-ASA) nga ang naeksperyensyhan nga pagpula sa kahawaan sa banwa sang La Castellana, Negros Occidental sang Sabado, ang normal phenomenon kag wala sang kaangtanan sa aktibidad sang Bulkan Kanlaon.
Sa interview sang Bombo Radyo kay Jan Baron, ang pagpula sang kahawaan ilabi na sa oras nga alas-5:00 tubtob alas-6:00 sang aga ang masami nagakatabo kadungan sa sunrise.
Dugang pa nga ang sanag sang adlaw ang nagatuga man sang pagpula sang kahawaan.
Suno diri, ang mga dust particles nga nabilin sa palibot sang Bulkan Kanlaon ang mahimo nakadugang man sa pagpula sang kahawaan.
Apang paathag sini nga wala ini nagakahulugan nga may ara sang peligro ukon indikasyon sang aktibidad sang bulkan.
Ginpaandaman man sang PAG-ASA ang publiko nga indi magkahadlok kag magsalig lamang sa opisyal nga impormasyon halin sa otoridad.
