Nabaton na sang walo ka mga Local Government Unit (LGU) sa probinsya sang Negros Occidental ang financial assistance nga halin sa Malacanang para sa mga apektado sang nakaligad nga Bagyo Tino.
Suno kay Negros Occidental Governor Eugenio Jose “Bong” Lacson, ginpatigayon kahapon sa Provincial Capitol ang pagturn-over sang cheque nga halin sa Office of the President.
Nahibaluan nga walo ka LGUs sa probinsya ang mahatagan sang bahin sa P50 million nga budget.
Kalakip diri ang La Carlota City, La Castellana kag Moises Padilla nga makabaton sang tig-P10 million.
Samtang, ang banwa sang Binalbangan, Bago City kag Hinigaran ang makabaton naman sang tig-P5 million.
Ang banwa sang Pontevedra kag Isabela ang makabaton naman sang tig-P2.5 million nga cash assistance.
Ang cash assistance nga igahatag sa mga pamilya nga nahalitan sang bagyo ang nakadepende kun totally damaged ukon partially damaged ang ila mga balay, kag ang bulig pinansyal ang indi maglapaw sa P5,000.
Pahayag sang Gobernador nga kahapon napanghatag na nila ang finacial asistance sa mga LGUs.
