Mamalayran sang P17,000 nga penalidad ang tag-iya sang motorsiklo, nga ginadala sang lalaki nga wala naghatag sang ligwa sa firetruck nga magaresponder sa sunog sa bahin sang Araneta Street, Bacolod City.
Sa interview sang Bombo Radyo Bacolod kay Land Transportation Office – Negros Island Region Director Jeck Conlu, ag tag-iya ang mangatubang sang apat ka mga violations nga nagdangat ang kabug-usan nga penalidad sa P17,000.
Ini ang pagbayolar sa failure to give way to emergency vehicle, no valid license registration, wala sang driver’s license, kag reckless driving.
Base sa pahayag sang driber, nagpinsar ini nga ang truck nga nagabusina ang yara sa iya atubangan rason nga wala siya gilayon nagpahigad.
Nahibaluan nga ang motorsiklo ang nakarehistro sa lain nga pangalan, wala narenew ang rehistro, samtang ang driver naman nga residente sang Brgy. Handumanan ang wala sang lisensya.
Suno kay Conlu, nakakadto na ang tag-iya kag ang driver sang amo nga motorsiklo sa Intelligence & Investigation Unit (IIU) kag ginpangayuan sila sang formal explanation nga kinahanglan masumiter sa Lunes.
Dugang pa, nga posible nga mablack-listed sa LTO ang driver.
