Ginpahayag ni Negros Occidental 3rd District Representative Javi Benitez nga importante ang ginpatigayon nga public consultation sa Talisay City kahapon agud masolusyunan ang mga problema sa sugar industry.
Nahibaluan nga si Benitez amo ang nagfile sang resolusyon agud mapatigayon ang public consultation, kun sa diin ginpamatian ang mga sentimyento, suhestyon kag reklamo sang mga apektado nga sektor, lakip na ang mga small sugar planters kag iban pa nga stakeholders.
Suno kay Benitez, wala na dapat nagdangat pa sa pag-oversight sa konsultasyon kun ini ang nasolbar na sang Executive Department.
Suno diri, sadto pa kuntani nasulbar ang problema sa sugar industry kun ginhimuan gilayon sang tikang sang gobyerno.
Dugang pa niya nga tuman ka importante ang public consultation bangud ang tanan nga mga proposal kag rekomendasyon ang iya isumiter sa Kongreso sa pagbukas liwat sang session sa Lunes.
Ini ang mangin basehan sang inquiry in aid of legislation, para sa benepisyo ilabi na sang mga mangunguma kag small planters.
Dugang pa ni Benitez, dapat mag-focus ang gobyerno sa long-term solution, maghatag sang klaro nga sugar importation policy ang Sugar Regulatory Administration (SRA), kag ini ang ipakita sa publiko agud mahibaluan kun ano gid ang ginapatuman nga polisa.
Nalipay man si Benitez nga nahatagan sang pagtamod sa public consultation ang problema sa industriya sang kalamay sa probinsya sang Negros Occidental kag nagalaum ini nga mahatagan gilayon sang nagakaigo nga solusyon.
