Magluwas sa kalamay, dako man ang gina-import sang Pilipinas nga Molasses.
Sa interview sang Bombo Radyo Bacolod kay former Negros Occidental Governor Rafael “Lito” Coscolluela, consultant sang Confederation of Sugarcane Producers Association Incorporated (CONFED), ginapasalamat sini nga natigayon na ang public consultation para sa Sugar Industry paagi sa Lower kag Upper House.
Suno diri, dapat mamonitor ang imbentaryo sang local production kag ang consumption ratio.
Pinaagi sini, mabanta kun tubtob san-o ang supply kag kun ini ang kulangon.
Suno kay Coscolluela, dapat lamang nga magset sang trigger point kun san-o dapat suguran ang proseso sang importasyon kag mag-import lamang sang sulusobra sang gamay sa kulang.
Panindugan ni Coscolluela, nga dapat himuon naman nga regular ang consulttative mechanism.
Sa pihak nga bahin, gin-athag sini nga indi lamang sa kalamay nagakatabo ang nagasulobra nga importasyon.
Suno kay Coscolluela, kasubong man sa Molasses, nga madugay na nga ginahimo.
Ang molasses suno diri ang ginagamit sa ethanol production kag engridient sa potable alcohol.
Suno kay Coscolluela, ang molasses ang indi pwede nga mapadugayan kag kinahanglan gilayon nga mabaligya.
Bangod sini, ang mga local nga maproduce nga molasses ang nagakapilitan nga ibaligya sa manubo nga presyo bangod kalabanan sa mga nagakinahanglan sini ang may ginasaligan nga imported.
Sa pihak nga bahin, naka-estorya naman sini si Dave Sanson, ang sugar planter representative sa Sugar Regulatory Administration.
Nahibaluan nga ginapanawagan sang mga sugar federation sa public consultation nga ini ang pahalinon sa pwesto bangod wala man nagakonsulta sa mga sugar planters.
Suno kay Coscolluela, ginkupirmar man sang mga sugar federation sa iban nga mga lugar nga nagakonsulta sa ila si Sanson, apang mahimo nga talagsa lamang ini makapamasyar sa Negros Occidental.
Gani suhestyon sini kay Sanson nga mangin bukas ini sa tanan, kag dapat ini ang mahapos matawagan sang mga planters kun kinahanglan./
