20 ka Estado sa America ang ginapaandaman nga mag-alerto, partikular na ang Texas bangod sa ginapaabot nga Super Winter Storm.
Sa interview sang Bombo Radyo Bacolod kay Noor Moraña, Bombo International News Correspondent Derekta sa Houston, Texas, kada tuig may nagaluntad nga winter storms, apang ini ang indi normal sa Texas bangod talagsa lamang sila maka-eksperyensya sang snow.
Sa forecast, ginalauman nga sa Sabado sang gab-i, oras sa America, maga-umpisa ang pagpanaog sang temperatura kag ini ang ginalantaw nga magaapekto sa 200 million nga Americans.
Ginalantaw nga halin sa karun nga 20 degrees Celsius nila nga temperatura, ini ang hinali nga magapanaog tubtob sa -15 degrees Celsius nga magalawig tubtob sa Lunes.
Suno diri sang 2021, nahalitan man sang winter storm ang Texas, kun sa diin masobra ginatos gid ang napatay.
Ang winter storm sadto ang naglawig sang isa ka semana.
Suno kay Moraña, ang masami rasun sang pagkapatay sa winter storm ang bangod sa hypothermia, kasubong man sa mga aksidente.
Pahayag sini nga indi kaangay sa iban nga mga Estado nga regular nga may snow, kag nadesinyo man ang mga salakyan sa pagdalagan sa snow, ang mga salakyan sa Texas ang wala sang kaangay nga mekanismo, gani delikado kun magfreeze na ang mga dalanon.
Suno diri, halos isa ka semana na nga wala sang ulan, apang wala man sang init bangod sa madamol nga gal-om nga nagatimaan nga may maga-abot nga bagyo.
Suno diri, ginapapreparar na sila sa ginalauman nga 83 oras nga below zero degrees Celcius.
Kalakip sa ginapapreparar na ang mga reserba nga pagkaon, tubig, gasolina, battery kag iban pa.
Ginapanugyan man nga tsekyaron ang mga kaingod partikular na kun may senior ciizen nga naga-isahanon sa puluy-an kasubong man ang constant nga pagcontact sa himata nga yara sa iban nga lugar sa America./
