Duha ka adlaw nga nag-utaw utaw ang tatlo ka mga manugpangisda nga residente sang Hinobaan, Negros Occidental nga narescue sang Singaporean-flagged bulk carrier sang Dominggo, Enero 25.
Sa interview sang Bombo Radyo kay Lieutenant Junior Grade James Carbajosa, Commander sang Coast Guard Station Southern Negros Occidental, ginkilala ang mga manugpangisda nga sanday, Crisfen Delos Santos, 32-anyos, Arman Quitoriano, 30-anyos kag si Ranel Danong, 39-anyos kag lunsay residente sang Brgy. Culipapa, Hinoba-an, Negros Occidental.
Sa report sang Philippine Coast Guard District Western Visayas (CGDWV), ang tatlo ka manugpangisda ang nag utaw-utaw sa kadagatan sa sulod sang duha ka adlaw kag isa ka gab-i.
Madumduman nga nalabyan sang bulk carrier ang tatlo sa kadagatan nga sakop sang Zamboanga del Norte, kag ini ang ila ginbuligan.
Suno kay Carbajosa, pag-abot sang mga mga narescue sa Ilo-ilo, gilayon man sila nga gin-assess sang Coast Guard Medical Station.
Sa karun, yara sila sa maayo nga physical condition kag wala sang immediate medical concerns.
Ginhatagan sang pasidungog nanday Philippine Coast Guard Commander Jan J Terazona kag Coast Guard Ensign El John C. Ga ang MV MAUD, bangud sa “commendable humanitarian act” kag “outstanding seamanship” sa pagluwas sa mga biktima sa tunga sang Sulu Sea.
Ang mga manugpangisda luwas na nga nakapauli sa Northern Negros Occidental kag nakabalik sa ila tagsa-tagsa ka pamilya.
