Patay ang 46-anyos nga lalaki matapos ginbuno sa Purok 1, Brgy. Mambugsay, Cauayan, Negros Occidental alas-8:46 sang gab-i sang Lunes, Enero 26.
Ginkilala ang biktima nga si alyas “Rey” kag kasado, samtang ang suspect naman ang ginkilala nga si alyas “Ernard”, 36-anyos, wala sang asawa, lalaki kag lunsay residente sa nasambit nga lugar.
Sa inisyal nga impormasyon, base sa panaysayon sang naka-witness, ang biktima ang yara sa sulod sang ila nga balay sang hinali lang nga nagsinggit ang suspect kag ginhangkat siya nga magwa.
Gilayon naman nga nagwa ang biktima sa balay kag didto nagbinaisay ang duha kag hinali nga ginsumbag ni alyas “Ernard” si alyas “Rey”.
Sa tunga sang kumosyon, ginhunos sang suspect ang kutsilyo nga yara sang iya nga hawak kag ginbuno ang biktima sang makapila ka beses.
Ang biktima ang nakalakat pa sang madasig apang sa ulahi ini ang natumba kag nalipungan.
Gilayon naman nga nagpalagyo ang suspect matapos ang krimen.
Nahibaluan nga ang biktima kag ang suspect ang may nakaligad na nga indi pag-intsindihanay nga ginapatihan isa sa rason sa natabo nga insidente.
Si alyas “Rey” ang gilayon nga gindala sa Cauayan District Hospital apang gindeklarar nga dead on arrival.
Sa karun, nagpatigayon sang hot pursuit operation ang Cauayan Municipal Police Station sa pagdakop sa suspect.
