Patay ang 11-anyos nga bata matapos malumos sang malumpatan sang iya nga classmate samtang nagapaligo sa suba sa Barangay Vista Alegre, Bacolod City pasado alas-12:00 sang udto kahapon, Enero 28.
Ginkilala ang biktima nga si John Neil Belligan, residente sa nasambit nga lugar.
Sa interview sang Bombo Radyo kay Police Captain Jay-r Reyes, Officer in Charge sang Bacolod Police Station 7, lima sila nga mag-classmate ang naghinagaray nga maligo sa suba bangud half day lamang ang ila nga klase sa Vista Alegre Elementary School.
Samtang nagapaligo sa suba, aksidente nga nalumpatan sang iya isa ka classmate ang biktima, kag ini ang naigo sa bahin sang ulo rason nga isiya ang nalipungan kag nalumos.
Gilayon naman nga nagresponde ang pumuluyo kag nagpangayo sang bulig sa rescue team sa nasambit nga Barangay.
Suno diri, nadugayan pa antes nakwa ang biktima sa tubig bangud sila lang nga lima ang nagapaligo sa suba.
Gilayon nga gindala ang biktima sa Bacolod Adventist Medical Center apang ini ang ginabawian sang kabuhi.
Panugyan ni Reyes sa mga maestra nga i-monitor ang mga estudyante nga magpuli diretso sa ila nga balay kun wala na sang klase.
