Mas ginpahugtan pa sang Philippine Coast Guard Northern Negros Occidental ang inspection sa mga RoRo kag Fast Craft vessel.
Sa interview sang Bombo Radyo Bacolod kay Lt Junior Grade Richelito Arbis, assistant station commander sang Coast Guard Station Northern Negros Occidental, ang Maritime Industry Authority (MARINA) ang nagapatigayon sang Vessel Safety Enforcement Inspection kada apat ka bulan nga nagaseguro sang mga dokumento kag mismo nga barko
Ang PCG ang nagapatigayon naman sang Emergency Readiness Evaluation kada anom ka bulan.
Luwas diri, antes maglayag ang barko, ginaseguro ang proper lashing ukon ang paghigot sang mga cargo.
Ginaseguro man nga balanse ang pagplastar sang mga cargo kag mga salakyan, agud indi madula sa balanse ang barko kag malayo sa risgo sang pagkapan kag paglugdang.
Ginaseguro man nga wala nagasobra ang pasahero.
Suno diri, kun may sobra bisan isa lamang ka pasahero indi gid nila pahalinon ang barko.
Ginaseguro man nga ang numero sang life jacket ang kaparehas sa maximum nga capacity sang pasahero.
Suno kay Arbis, may sea marshal man nga ginapa-upod sa pila ka mga barko, nga nagareport sa dungkaan nga coast guard substations.
Pahayag sini nga ginapili lamang nila ang ginapa-updan sang sea marshal bangod kulang pa sa personnel ang PCG.
