Ginkumpirmar sang Filipino shoe designer nga si Jojo Bragais nga upod niya sa Iloilo City si Miss Universe Philippines 2023 Michelle Dee sang Enero 17 kun sa diin ang petsa nga gina-alegar nga ang driver nga si Bonifacio Baro ang ginsakit ni sanday Dee, actress Rhian Ramos kag ni Samantha Panlilio.// Nag-post si Bragais sa Facebook sang Huwebes nga imposible ang amo nga alegasyon bangud ginlaragway sini ang karakter ni Dee kag Panlilio bilang isa ka “chill” nga mga tawo.// Pahayag sini, kun paano niya nakilala si Dee kag Panlilio, nagapati ini nga indi matuod ang alegasyon batok sa tatlo.// Base sa pahayag sang driver, gina-alegar nga ginkastigo kag ginpriso siya sa isa ka unit ni Dee, Ramos kag ni Panlilio halin sa Enero 17 tubtob 18.// Apang, ginkumpirmar kahapon sang abogado ni Dee nga yara ini sa Iloilo sang Enero 17.// Dugang pa, may ara sang ticket sang eroplano, mga posting sang mga laragway nga magapamatuod nga sa bilog nga adlaw sang Enero 17 yara ini sa Iloilo.// Ginpaathag ni Bragais nga wala siya sang madumduman nga naga-upod si Dee sang body guard kun ini ang may event, provincial judging ukon commercial shoot.// Ginpanginwala sang kampo nila Dee, Ramos kag Panlilio ang alegasyon sang illegal detention kag assault nga ginpasaka batok sa ila ni Baro. // Pahayag sang ila legal counsel nga wala pa nila mabaton ang reklamo nga gin-file batok sa ila sa National Bureau of Investigation, apang pasalig sini nga sila ang gilayon nga magahatag sang sabat sa tion nga mabaton na nila ang kopya sini.///
