Ginkumpirmar ni US President Donald Trump nga nagsugot si Russian President Vladimir Putin sa iya personal nga request nga untaton ang pagpang-atake sa Kyiv kag sa iban nga ciudad sa Ukraine.
Ini kasunod sang pagpang-atake sang Russia sa power infrastructure sang Ukraine nga nagresulta sa pagkadula sang suga, heating kag water supplies, pagnubo sang temperatura kag pagtuhaw sang panibag-o nga humanitarian crisis.
Wala pa ginkumpirmar sang Kremlin kun may yara sang ceasefire samtang ginpasalamatan naman ni Ukrainian President Volodymyr Zelensky si Trump kag ginsiling nga nagasalig sia sa Washington nga masiguro ang pag-untat sang gyera.
Gin-forecast sang state weather sang Ukraine ang madasig nga pagnubo sang temperatura tubtob sa minus 30C sa masunod nga mga adlaw samtang padayon ang pagtinguha sang mga otoridad nga mabalik ang mga serbisyo.
