Linibo ka mga indibidwal ang naapektuhan sang pagbaha sa Northern Negros Occidental bangud sa pag-inulan dala sang Shear Line sang Sabado.
Sa interview sang Bombo Radyo Bacolod kay Irene Bel Ploteña, pinuno sang Negros Occidental Provincial Disaster Risk Reduction Management Office (PDRRMO), ang probinsya sang Negros Occidental kalakip na ang ciudad sang Bacolod ang nakaeksperyensya sang Sabado sang mabaskog nga pag-ulan dala sang shearline weather system.
Suno kay Ploteña, ang pag-ulan ang nagtuga sang pagbaha sa pila ka mga Local Government Units sa probinsya.
Ang opisyal nga nakareport nga may pagbaha amo ang Toboso, EB Magalona, Sagay, Calatrava kag Cadiz.
Nagdangat naman sa 1091 ka pamilya ukon 4034 ka indibidwal ang apektado sang pagbaha.
Sa karun may 1034 ukon 3982 ka indibidwal ang nag-evacuate tungod sa pagbaha.
May reported nga landslide sa Barangay Polopangyan, Toboso.
Samtang may reported man nga casualty nga isa ka 87 anyos nga senior citizen nga babayi nagasuprer sang paralysis matapos nga wala makagwa sa ila balay bangud sa pagbaha nga nagluntad sa Sagay City.
Nagdeklarar nga wala sang klase ang banwa sang Toboso kag sang ulihi ang ciudad sang Sagay ang nagdeklarar man bangud sa pag-ulan dala sang Shear Line Weather system.
Bangud sa pag-inulan nagdangat sa 12 ka balay ang totally damage kag 33 ang partially damage.
Ang pagbaha ang bangud nga nag-awas ang Himogaan River sa Northern Negros bangud sa madamol nga pagbubo sang pag-ulan.
Sa karun ginahulat pa sang Negros Occidental PDRRMO ang report sang Department of Agriculture kun pila ang kahalitan nga gintuga sang pagbaha sa Agrikultura sang probinsya.
