Ginpahayag sang Department of Health (DOH) nga wala pa sang narecord nga aktibo nga kaso sang Nipah Virus sa pungsod, kag ginpasiguro nga padayon ang ginahimo nga mga preparasyon sang ila ahensya agud malikawan ang pagsulod sang virus sa borders sang Pilipinas.
Suno kay DOH Assistant Secretary Albert Domingo, kabahin ang Pilipinas sa mga pungsod nga hugot nga naga-monitor sa mga nagasulod kag nagagwa sa borders kalakip na ang Taiwan kag Thailand bangud sa virus.
Pahayag sini nga sa ila nagapadayon nga monitoring, wala pa sang may na-record nga pumuluyo nga may mga sintomas ukon may history sang exposure sa Nipah Virus.
Ginpaathag sang tagapamaba, base sa mga datos nga ginhatag sang India, duha lamang ka kumpirmado nga kaso sang virus ang yara sa ila pungsod.
Bangud sini, mas ginpahugot pa ang pagpatuman sang mga layi sa mga airports, ilabi na sa Ninoy Aquino International Airport (NAIA), kun sa diin may ara na ang DOH sang mga dedicated spotter nurses agud bantayan kag obserbahan ang mga naga-abot nga pasahero.
Suno diri, ang mga sintomas sang virus amo ang mga normal nga mabatyagan nga sintomas kaangay sang hilanat, kasakit sang lawas, sip-on, kag mala-trangkaso nga balatian kag ang mas malala nga sintomas sini amo ang pagkamanhid sang utok.
Pahanumdom sang departamento sa mga nagabatyag sang amo nga mga sintomas nga indi mag-panic bangud indi ini nagakahulugan nga Nipah Virus na.
Samtang, bangud wala pa sang bakuna para sa amo nga virus, ginapreparar na sang DOH ang ila mga isolation room sa mga DOH hospital kag pati na sa Research Institute for Tropical Medicine sa Muntinlupa bilang mga isolation area.
