Rafah crossing sa border sang Gaza kag Egypt, ginbuksan “partially” sang Israel

Partial nga ginbuksan liwat sang Israel ang Rafah crossing sa tunga sang Gaza kag Egypt kahapon, Pebrero 2 matapos ang pila ka bulan nga pressure sang mga humanitarian groups, apang limitado lamang ang makalabay diri.

Ang Rafah crossing ang alagyan para sa mga sibilyan kag sa mga assistance.

Nahibaluan nga ginpasarado ang amo nga crosing halin sang nakuha sang Israel ang kontrol sini sang Mayo 2024, kag nabuksan lamang sa isa ka beses sang 2025.

Masobra 200 ka mga pasyente ang nagahulat nga makagwa sa Gaza para sa medical nga pagbulong sa tion nga tugutan na sila nga makalabay, suno sa health ministry sang Gaza.

Masobra 40 ka mga Palestino nga may kaangtanan sa Palestinian Authority ang nakaabot na sa Egyptian nga bahin sang crossing agud makasulod sa Gaza kag magsugod sang ila trabaho.

Gintugutan sang Israel nga buksan liwat ang crossing matapos marekober kag malubong ang bangkay sang Israeli hostage nga si Ran Gvili.

Ginalantaw sang mga opisyal ang pagbukas liwat bilang isa ka pilot phase apang wala pa sang final agreement kun pila ka mga Palestino ang tugutan nga makalabay.