Natalana nga iga-demolish ang Bacolod Arts and Youth Sports Center (Bays Center) kag pila ka mga establisyemento bilang kabahin sang redevelopment project para sa Manokan Country.
Sa interview sang Bombo Radyo Bacolod kay Atty Vanessa Encabo, Spokesperson sang Bacolod City Legal Office, amat-amat na nga ginsuguran ang demolisyon kun sa diin gin-una anay ang City Legal Office Impounding Area.
Igasunod diri ang iban pa nga mga opisina lakip na ang Tourism Office, Criminal Investigation and Detection Group (CIDG) Office, kag Nutrition Center.
Samtang ang Bays Center naman ang ipa-ulihi nga i-demolish.
Ginpangunahan ang amo nga proyekto sang City Engineer’s Office, upod ang bulig sang City Legal Office kun sa diin target nga matapos ang bug-os nga demolisyon sa Marso 31.
Suno diri, magapatigayon pa sang resurvey ang City Engineer’s Office agud mausisa kun may yara pa sang mga estruktura nga madalahig sa demolisyon, bangud may pila pa ka mga opisina nga wala pa sang sayluhan, lakip na ang Bacolod Police Station 1 kag ang Commission on Elections (COMELEC).
