Lima ang legitimate account samtang yara sa 10 tubtob sa 15 ang troll accounts nga namonitor nga nagpalapta sang sadto pa nga mga video sang pagbaha sa Bacolod City kahapon.
Sa interview sang Bombo Radyo Bacolod kay Bacolod City Administrator Atty Mark Steven Mayo, ang pagpalapta sang patalang nga mga social media postings ang makabig nga krimen ukon unlawful use of means of publication.
Ini bangod ang indi husto nga posts ang nagahatag sang kahadlok sa mga pumuluyo, kasubong man sa mga yara sa gwa sang Bacolod City nga may himata sa ciudad.
Suno kay Atty Mayo, ang paglapas sa Article 154 sang Revised Penal Code, ang may katumbas nga penalidad nga isa ka bulan tubtob anom ka bulan nga pagkapriso, kag multa nga P40,000 tubtob P200,000 depende sa desisyon sang korte.
Suno diri, kagab-i luwas sa pag-asikaso sa mga stranded passengers, pagtutok sa evacuation kag pagpreparar para sa relif operations, isa man sa nangin trabaho nila ang pagpangita sang mga fake news sa social media angot sa pagbaha.
Lima ang natumod nga legitimate nga account kun sa diin iban diri ang mga dalagko nga mga vloggers kag may-ara man sang madugay na nga nagapost kontra sa administrasyon, samtang 10 tubtob 15 naman ang troll accounts.
Pahayag ni Mayo, nagakoordinar na sila sa City Legal Office para sa pagpasaka sang kaso, kun sa diin mauna nga makasuhan ang mga nakilala na ang nagpost, samtang may proseso pa nga himuon agud matumod kun kay sin-o ang mga troll accounts.
Suno diri, makita gid sa iban nga hungod may conscious effort ukon ginhungod ang pagpost sang fake news, bangod nagapanawagan pa nga ishare para sa monetization.
Paathag ni Mayo nga wala gid sang problema kun magpost sang mga pagbaha kun ini ang matuod nga nagakatabo.
