Nagdangat na sa 12 ka mga indibidwal ang nareport nga napatay matapos ang paglaslas sang bagyo Basyang.
Suno sa Office of Civil Defense (OCD), siyam ka mga napatay ang na-record sa Northern Mindanao kun sa diin apat ang napatay bangud sa landslide sa Cagayan de Oro City samtang apat naman sa Lanao del Norte kag ang isa ang padayon nga gina-validate.
Samtang, tatlo naman ka mga napatay ang narekord sa Caraga region, duha sa Surigao del Sur kag isa sa Agusan del Norte.
Ginpahayag sang Philippine Atmospheric, Geophysical and Astronomical Services Administration (PAGASA) nga naghuyang na ang Basyang kag nangin low-pressure area (LPA) kahapon sang kaagahon matapos mag-landfall sang lima ka beses sa bahin sang Mindanao kag Visayas.
Suno sa OCD, 9,532 ka pamilya ukon 31,981 ka indibidwal ang nagpatigayon sang pre-emptive evacuation sa nagkalain-lain nga rehiyon nga ginalakipan sang 1,343 ka pamilya ukon 6,270 ka indibidwal sa Negros Island Region, 784 ka pamilya ukon 2,498 ka indibidwal sa Central Visayas kag 6,878 ka pamilya ukon 23,093 ka indibidwal sa Caraga.
Nagdangat naman sa 10,083 ka pamilya ang narekord nga nagakinahanglan sang bulig, nga may P6.51 million nga balor sang relief assistance.
