Ginkumpirmar sang Special Investigation Task Group Bornales nga magluwas sa dugo nga nakuha nagikan sa bato nga ginlampos sa mag-ulutod, ginpaidalom man sa DNA testing ang nail clippings ukon punta sang kuko sang mga biktima sa paglaom nga makakuha sang mga ebidensya angot sa mga suspetsado.
Sa interview sang Bombo Radyo kay SITG Bornales spokesperson Police Capt. Judesses Catalogo, ginpaidalom sa DNA testing ang nail clippings sang 9-anyos nga napatay kag 14-anyos kag apat ka tuig nga yara sa karon sa ospital bangud mahimo nga may nabilin nga panit sang suspetsado kun sila ang nakabato.
Ini ang dugang sa dugo nga nakuha sa duha ka bato nga ginlampos sa Bornales siblings sa Hacienda Badiang, Brgy. E. Lopes, Silay City sang Pebrero 7.
Diri man makita kun iya lang gid sang mag-ulutod ang dugo sa bato nga yara man sa sulod sang kwarto kun sa diin sila ginlampusan.
Ang DNA samples ang ginpadala sa PNP Crime Laboratory sa Cebu kag magadugay sang duha tubtub tatlo ka semana antes makagwa ang resulta.
Suno kay Catalogo, wala sang fingerprints nga nakuha sa crime scene bangud magaras ang surface.
Suno sa iya, ang fingerprinting ang applicable lamang sa mahining kag matapan nga surface.
Samtang wala naman sang dapat kahangaw-an kun ginpaulanan na sang Pamilya Bornales ang foam kag mga ulunan nga ginhigdaan sang mag-ulutod.
Suno kay Catalogo, ginasiguro sang Scene of the Crime Operation nga nakuha na nila ang kinahanglanon nga ebidensya sa crime scene antes ini macontaminate ukon iturnover balik sa pamilya.
