Ginaduso ni Senator Francis Pangilinan sa senado ang voucher program para sa mga estudyante sa pribado nga eskwelahan halin sa low-income kag middle-income nga pamilya.
Sa idalum sang Senate Bill No. 1841 ukon ang “Private Education Voucher Expansions (PEVE) Act,” tinutuyo sini amo ang pagpalapad sang sakop sang pinansyal nga bulig para sa mga underprivileged nga estudyante halin sa kindergarten tubtob senior high school nga napilitan mag-eskwela sa pribado nga eskwelahan bangud sa nagaginutok ukon kakulangan sang malapit nga pampubliko nga eskwelahan.
Nalakip man sa hagna ang pag-amyenda ukon pagbasura sang pila ka probisyon sang Republic Act No. 8545 ukon ang Expanded Government Assistance to Students and Teachers in Private Education Act.
Nakabutang man diri sa explanatory note nga makabaton sang voucher assistance ang mga estudyante halin sa middle-income nga pamilya base sa klasipikasyon sang Philippine Statistics Authority (PSA) nga nagikan sa mga pampubliko nga eskwelahan nga ginpahayag sang Department of Education (DepEd) nga congested, ukon mga naga-istar sa mga lugar nga wala sang malapit nga pampubliko nga eskwelahan kag luyag mag-enroll sa pribado nga eskwelahan.
