Ginpahanugotan na ang mga pumuluyo sang Brgy Sto. Niño, Tanjay City, Negros Oriental nga magpauli sa ila mga balay matapos nga gindeklarar sang Philippine Army nga clear na ang area.
Sa interview sang Bombo Radyo kay Brig. Gen. Jason Jumawan, commander sang 302nd Infantrty Birgade, humalin pa sang Enero sang tinalikdan nga tuig nag-umpisa ang pagpanggamo sang remnants sang Southeast front sang New People’s Army kun sa diin nagdangat na sa 26 ang ila napatay sa Negros Occidental kag ang latest nila nga ginhimo amo ang pagpatay sa 74 anyos nga babayi sa Kabankalan City.
Suno diri, kalabanan sa mga rason nga ginasugid sang mga rebelde amo nga espiya sang gobyerno ang mga biktima apang paathag ni Jumawan nga mga ordinaryo lamang nga tawo nga luyag mangabuhi ang mga ini kag kun mahatag man sila sang impormasyon sa militar, ina ang ila na nga kinamatrong.
Sa karun padayon ang military operation kag ginalauman sini nga sa masunod nga mga semana may yara na naman sang development. Nagdangat sa 22 ka pamilya ukon 109 indibidwal ang gin-evacuate kahapon.
Matapos nga naclear ang area, ginpahanugotan na ang mga pumuluyo magpauli sa ila mga balay.
