Gindakop sang mga police si former Prince Andrew nga manghod sang hari sang Great Britain nga si King Charles III.
Gin-detain ang anay prinsipe nga kilala subong bilang si Andrew Mountbatten-Windsor bangud sa ginasuspetsahan nga misconduct sang tion nga nagserbe ini bilang trade envoy sang United Kingdom.
Natabo ang pag-aresto kadungan mismo sang ika-66 nga kaadlawan sang former prince. Siya ang labing-una nga senior British royal nga gindakop sa halos 400 ka tuig.
Magluwas sa pagdakop sa iya, gin-usisa man sang kapulisan ang iya duha ka mga propiedad.
Ini ang kasunod sang mga rebelasyon sa bag-o lang gin-release nga mga dokumento sa Estados Unidos sang Amerika nga nagaangot kay Andrew sa nagtaliwan nga sex offender kag pedophile billionaire nga si Jeffrey Epstein.
Madumduman nga una na nagpahayag ang awtoridad nga posible nga imbestigaran ang utod sang hari bangud sang amo nga kaangtanan sini kay Epstein, kag igarepaso man ang alegasyon nga nag-share ini sang confidential material.
Ginpanginwala naman anay sang former prince ang tanan nga akusasyon batok sa iya kag nanindugan nga wala siya nakasaksi ukon nakamutik sang anuman nga ginahimo ni Epstein.
Si Andrew amo anay ang Duke of York kag nagserbe bilang trade envoy halin sang 2001 tubtub sang 2011.
Nagbyahe ini sa madamo nga mga pungsod kag may access sa senior government kag business contacts sa bilog nga kalibutan.
