Sa karun wala pa sang flag bearer ang oposisyon para sa magapapili nga Presidente sa 2028.
Sa interview sang Bombo Radyo Bacolod kay 1Sambayan convenor former Negros Occidental governo Rafael “Lito” Coscolluela, madamo sa mga political supporters ang indi na mahim-os kasunod sang pagdeklarar ni Vice President Sara Duterte nga magapapili sa 2028 Presidential election.
Suno diri, naga-umpisa na sila sa pagbalay sang siyam ka mga convenor’s group, kun sa diin nakadesisyon naman si former vice president kag karun Naga City Mayor Leni Robredo nga mangin miyembro.
Target nila nga makapagwa na sang desisyon sa ila mangin flag bearer sa Oktubre.
Sa usual process, sila ang magabatun sang nominations kag ginaplastar naman nila ang mga kondisyon kag basihan sang pagpili sang itib-ong agud mangin masunod nga leader sang pungsod.
Ginalauman sini nga antes matapos ang Marso matapos na sila sa nominations.
Kalakip sa mga ginakonsiderar sanday Robredo, Senator Risa Hontiveros kag Senator Bam Aquino.
Pahayag ni Coscolluela nga may pros and cons sa temprano nga pagdeklarar sang plano nga pagpapili.
Kun temprano nga makadeklarar, malakip na sa listahan sang mga survey sang Presidentiables kag makita ang level of acceptability sang publiko.
Gani sila ang makaplastar man sang pamaagi agud makuha ang pagsalig sang mga Pilipino.
Apang kabaylo sini, lauman nga magasugod naman ang mga black propaganda kag mga pagpang-atake sa social media.
Gani para sa mga Presidential candidates, sila ang dapat preparado sa kaangay nga mga pagpang-atake.
Ginalantaw naman ni Coscolluela nga mahimo wala nagasaka ang ratings ni Senator Risa kun ipaanggid kay VP Sara.
Suno diri, kun magdesisyon gid man si Robredo nga indi na magpapili sa Presidential seat, ginalantaw sini nga magasaka man ang ratings ni Senator Risa bangod indi na matunga ang desisyon sang botante.
Samtang aminado si Coscolluela nga indi pa mapaktan kun sin-o gid ang magapapili bangod kun kis-a may mga naga-kandidato nga indi pa mabatian sa umpisa apang gulpyada lamang nagagwa ang pangalan kun malapit nalang ang piniliay.
