Nagpasalamat ang Bacolod City Police Office Traffic Enforcement Unit sa Land Transportation Office National Office nga nagpatigayon sang Regional Deputation Training Workshop para sa pagpatuman sang land transportation laws kag iban pa nga mga regulasyon.
Kaupod sang mga kapulisan sa workshop ang Bacolod Traffic and Transportation Management Department (BTTMD) kag Highway Patrol Group (HPG).
Sa interview sang Bombo Radyo kay Police Major Elmer Bonilla, dapat makapasar sa examination kag field enforcement assessment antes hatagan sang Temporary Operator Permit ukon ID ang mga kapulisan nga nagpartisipar agud pahanugutan nga magpanakop.
Ang mga deputized agents ang magabulig sa LTO sa implementasyon sang Republic Act 4136 ukon Land Transportation and Traffic Code.
Ginapangabay ni Bonilla nga makapasar sa assessment ang ila mga personnel agud makabulig sa pagpatuman sang mga regulasyon sang LTO sa dalanon.
