Pormal na nga gin-umpisahan sang International Criminal Court (ICC) ang presentasyon ng mga ebidensya batok kay anay President Rodrigo Duterte nga may kahilabtanan sa maduguon nga drug war sa administrasyon sini.
Ang hearing ang ginpangunahan ni ICC Deputy Prosecutor Mandiaye Niang paagi sa paghatag sang statement kun sa diin gin-file sini ang overview of the evidence sa husgado.
Suno kay Niang, ang tikang nga ini ang isa ka importante nga kabahin sang pagpangita sang hustisya para sa mga linibo ka mga biktima nga napatay sa idalom sang kampanya batok sa illegal nga droga sang gobyerno.
Nagpaandam man ang opisyal nga wala sang sin-o man nga mahimo makapalagyo sa salabton.
Samtang nagpanindugan ang International Criminal Court (ICC) nga si anay President Rodrigo Duterte ang may direkta nga kontrol kag nagapondo sa lapnagon nga pagpamatay sa idalum sang iya anti-narcotics campaign.
Sa ginpatigayon nga confirmation of charges hearing sang Lunes nga wala gintambungan ni Duterte, ginpunto ni ICC Prosecutor Mame Mandiaye Niang nga ginapondohan kag personal nga ginatumod sang anay Presidente ang mga target sang Davao Death Squad ukon DDS.
Suno kay Niang, importante ang kontribusyon ni Duterte agud maneutralize ang mga kriminal sa Pilipinas paagi sa pagpatay.
Ginpahayag sang prosecutor nga magluwas sa regular nga sweldo, nagabaton man sang cash sa kada ulo ang mga suspetsado nga direkta nga nagasunod bangud sa kahadlok ukon reward.
Sa rekord sang gobyerno, kapin 6,200 ang napatay sa drug war apang suno sa human rights groups, posible nga nagalab-ot ini sa 30,000.
