Ginpatpat sang ICC Prosecution kag Trial Lawyer nga si Atty Robynne Croft ang mga rason kun ngaa makabig si former President Rodrigo Duterte nga indirect co-perpetrator sa ginaalegar crimes against humanity sa Pilipinas.
Sa iya pagpresentar sang mga ebidensya sa ikaduha nga adlaw sang confirmation of charges hearing, ginpahayag ni Croft nga si Duterte kag ang iya mga co-perpetrators amo ang naga-control sang structure of power nga ginhingadlan nga Davao Death Squad kag national network.
Pahayag niya nga ini ang ginagamit sang anay opisyal agud ma-neutralize ang mga kriminal.
Base sa government records, yara sa ginabanta 6,200 ka drug suspects ang ginpamatay sa idalom sang war on drugs sang anay Presidente.
Samtang pormal naman nga gintumod sang prosecution team sang International Criminal Court (ICC) ang pila ka matag-as sa karun kag anay opisyal sang Pilipinas bilang gina-alegar nga mga co-perpetrators ukon kakumplot ni anay President Rodrigo Duterte sa kontrobersiyal nga kampanya batok sa ilegal nga druga.
Sa pagpadayon sang hearing sa ICC, gin-isa isa man ni Croft ang mga nagapanguna nga mga opisyal nga naghimo sang importante nga papel sa pagpatuman sang maduguon nga war on drugs sang nakaligad nga administrasyon.
Kalakip sa mga hayag nga ginpangalanban sa hearing amo sanday anay Philippine National Police (PNP) Chief kag sa karun Senador Ronald “Bato” Dela Rosa, Senador Christopher “Bong” Go, kag anay Department of Justice (DOJ) Secretary Vitaliano Aguirre II.
Ginpahayag man nga may yara pa sang iban nga mga opisyal nga kalakip sa mga listahan.
Ang pagtumod sa mga co-perpetrators ang isa sa importante nga tikang sang prosecutor agud nga mapamatud-an nga ang serye sang mga pagpatay ang indi lamang personal nga desisyon sang anay presidente kundi may koordinasyon kag direkta nga partisipasyon nagikan sa iya nga ginasaligan nga opisyal.
