Ginpresentar sang prosecution team sang International Criminal Court (ICC) ang mga video kag dokumento agud mapamatud-an nga nagatumod sa pagpatay ang kataga nga “neutralization” sa idalom sang war on drugs sang nagligad nga administrasyon.
Sa hearing kagab-i gin-presenter ni ICC Trial Lawyer Edward Jeremy ang ginatawag nga “Duterte list” bilang ebidensya.
Ginpagwa man ni Jeremy ang mga video sang anay Presidente nga nagapakita sang mga ginpangbuy-an nga mga tinaga ni Duterte sang ini pa ang nagadumala sa nasambit nga kampanya batok sa illegal nga droga.
Suno pa sa prosecution, ang mga ginpresentar nga ebidensya nagakaigo lamang agud mapamatud-an ang mga natabo nga pagpamatay sang administrasyon sang anay Presidente.
Ginpahayag man sang prosecution ang pagpatay sa 17-anyos nga estudyante nga si Kian delos Santos sang tion nga ginpatuman ni former President Rodrigo Duterte ang drug war.
Ginpakita ni Jeremy ang memorandum nga ginpanagtag sa mga katapo sang Philippine National Police (PNP) sa idalom sang Duterte administration nga naga-unod sang “anti-illegal drugs campaign plan”.
Ini ang may katuyuan nga ma-“neutralize” ang problema sa iligal nga droga sa Pilipinas.
Ginpirmahan ini ni anay Philippine National Police chief kag sa karun Senator Ronald “Bato” Dela Rosa nga una na ginhingadlan sang ICC bilang co-perpetrator sa drug war.
