Kaangay nga normal na lamang sa mga pumuluyo sa Barangay Sag-ang, La Castellana ang pag-ulan sang ashfall gikan sa Bulkan Kanlaon.
Sa interview sang Bombo Radyo Bacolod kay Punong Barangay Rolando Torres, light ashfall lamang ang nabatyagan sa iban nga mga Barangay, kag kaangay nga sa ila lamang ang madamol ang nagtupa nga abo.
Suno diri, wala sang nag-evacuate sa ila Barangay apang may pipila nga nagpa-ubos lamang ukon nagtinir sa ila himata.
Pahayag ni Torres nga kaangay nga naanad na ang mga pumuluyo, bangod masami gid man nga gina-ulan sang ashfall ang ila nga lugar.
Suno diri, sang paglupok sang Bulkan nakaligad semana, ginpadal-an na sila sang supply sang facemask, apang wala magamit bangod wala man sila nakaeksperyensya sang ashfall.
Gani ini na lamang ang ginpanghatag nila sa mga residente nga nagpangayo.
Sa pagtsekyar sang Bombo News Team, madamo sang pumuluyo kalakip na ang mga kabataan nga wala nagasuksok sang facemask.
Apisar nga naanad na sa sitwasyon, sila ang ginpanugyanan naman nga magpreparar kag manghimos sang dalal-on inkaso may patigayunon nga evacuation.
Samtang esturyahan pa sang Barangay Council kun ipadayun ukon ipostpone ang highlights sang ila fiesta nga naka-schedule bwas.
Apisar sa pag-ulan sang abo, ang mga lin-ay ang padayun gihapon sa ila nga practice kaina sang aga.
