Gintawag sang abogado kag anay konsehal sa Bacolod City nga “comedic” ang rebelasyon sang 18 ex-Marines angot sa deliveries sang mali-maleta nga kwarta gikan sa kurapsyon.
Sa interview sang Bombo Radyo Bacolod kay Atty Renecito Novero, mas mapatihan kuntani ang affidavit kun may-ara ang kada isa sa 18, sangsa ini ang ginhimo nga joint affidavit.
Bisan si Atty Levito Baligod ang aminado man nga indi full-proof ang allegations, kag nagkumpirmar nga ang isumiter sa Ombudsman ang indi complaint affidavit kundi joint affidavit lamang nga nagalaom nga imbestigahan sang Ombudsman.
Apang pahanumdom sini nga lantawon pa sang Ombudsman kun ang kaso ang may ” reasonable certainty of conviction”, nga amo na sa karun ang standard, indi kaangay sadto nga pwede na ang “reasonable cause.”
Bangod madamo ini sang nakita nga kapaltahan sa affidavit, nagapati ang abogado nga indi magprosper sa Ombudsman ang request sa imbestigasyon.
Isa sa gintumod sini nga lapses sa pahayag, amo ang deliveries sang balor P85 billion nga kwarta gikan sa ila sadto amo nga si ex-Ako Bicol Partylist representative Zaldy Co.// Suno kay Novero, magakinahanglan sang 16,100 ka maleta para sa nasambit nga kantidad.
Pahayag sini nga madamo sang kulang sa affidavit, kag kwestyonable man kun sa diin makabakal sang amo ka damo nga maleta si Co.
Dugang pa sini nga madamo man nga balik-balik sang salakyan kag bisan heelicopter pa sa pagdul-ong sang amo kadamo nga maleta.
Suno diri, dapat nga gindetalye ang petsa kag oras sang deliveries, kag kun kay sin-o gindul-ong ang mga maleta.
Ang pahayag ni Co sadto nga wala ini sang may nakuha nga partida gikan sa mga kantidad ang nagakontra man sa rebelasyon.
Suno kay Novero, kun wala sang ginabatun si Co, wala man ini sang ipasweldo sa 18 ex-Marines.
Nagapati ang abogado nga duha ang purpose sa pagpagwa sang rebelasyon, nga ginalakipan sang paglabugay sa proceedings sang kaso ni former President Rodrigo Duterte sa International Criminal Court, kag ang makahakot sang maga-upod sa ginplano nga rally-protest batok kay President Ferdinand “Bongbong” Marcos Jr. sang Pebrero 25.
