Gin-anunsyo sang General Authority of Civil Aviation (GACA) nga isa ka drone strike ang nag-igo sa Kuwait International Airport nga nagresulta sa minor injuries sa pil ka mga mamumugon kag pagkaguba sa passenger building sang airport.
Sa kay Abdullah Al-Rajhi, spokesperson sang ahensya, gilayon nga ginpatuman ang emergency procedures agud ma-aksyunan ang nahalitan sa amo nga pangpang-atake.
Bangud sini, nasecure ang lugar kun sa diin nasugoran man gilayon ang assesment operations nga nagasunod sa safety protocols sang airport.
Naghatag man sang bulig medikal ang ahensya sa mga nasamaran.
Suno sa report, ginpatigayon sang technical team ang ila evaluation tuhoy sa nahalitan sang drone strike kasubong man ang operational procedures sang airport agud masiguro ang padayon nila nga sebisyo.
Ginpasiguro sang GACA nga kontrolada na sang mga otoridad ang sitwasyon kag nagapabilin nga prayoridad ang kaluwasan sang mga pasahero kag mga empleyado sang airport.
Dugang pa, magapagwa ini sang dugang nga impormasyon sa oras nga may makumpirmar na nga detalye.
