2NE1 member Park Bom, nagpahayag nga siya ang gingamit nga “scape goat” agud tabunan ang gina-alegar paggamit sang illegal drugs ni Sandara Park

Ginbuyagbuyag sang miyembro sang 2NE1 nga si Park Bom nga siya ang gin-gamit agud tabunan ang gina-alegar paggamit sang illegal nga druga sa iya bandmate nga si Sandara Park.

Nagpaggwa si Bom sang isa ka handwritten letter sa Instagram para sa iya mga fans nga gilayon man niya nga gindelete kahapon, Marso 3.

Ginbalikan sini ang iya mga nakaligad nga kaso kun sa diin gin-akusahan ini nga naga-import sang ilegal nga druga sa South Korea.

Sang 2010, gina-alegar nga nag-import ang singer sang 82 tablets sang Adderal, isa ka bulong nga may amphetamine kag dextroamphetamine nga ginagamit para sa ADHD kag narcolepsy.

Ginpaathag niya sadto nga ini ang para sa iya medical treatment, gani ginbasura ang kaso.

Sa iya letter, ginatudlo niya si Sandara bilang isa sa mga nagagamit sang ilegal nga druga.

Suno kay Bom, siya ang ginhimo nga scapegoat agud tabunan ang kaso sang iya nga bandmate.

Apang, wala sini ginmitlang kun sin-o ang nagpilit sa iya nga magserbe bilang “cover-up’.

Ginklaro sini nga indi siya druggie kundi isa siya ka ADHD patient.

Aminado ini nga mahimo nga maguba ang iya repurtasyon sa iya pagpakita sang letter apang suno diri, nagpakabakod ini agud nga mabatian man ang iya nga bahin.

Ginpanawagan man ni Bom ang publiko nga imbestigahan ang kamatuoran kag nanawagan kanday Yang Hyun-suk, founder sang YG Entertainment, kag kay CL, lider sang 2NE1 nga indi na siya liwat nga isurrender pa sa otoridad.

Samtang, ginpahayag sa isa ka malapit nga source kay Bom nga ginsulat niya ang letter bangud may ara siya sang “unstable condition” kag nangayo sang paghangop sang publiko.